·         CURHAT NGENAAN KAULINAN BARETO 

JENG KIWARI

"Rada haneeul ka pilem si boy teh..!!"

Tangtos na urang sadaya arapal kana lalakon si boy anu aya di anak jalanan ceneul RCTI... alus sabener na mah eta lalakon teh, keur mah kasep bari sok nulungan saha we nu kudu di tulungan.

Tapi da sabenernamah barudak urang tong waka kudu diwanohkeun jeung lalakon nu beunghar, boga motor badag, rejeng adegan kekerasana eta...

Ngadag ngadag barudak jaman ayeuna anu smp malihan mah sd tos rea marake motor badag, da hayang jadi jawara kawas si boy,, kadang nu kolot na beunghar mah di pangmeulikeun we eta motor badag pamenta si budak. Bari teu di titenan jeung teu aya deui perhatosan kunaon jeung keur naon eta budak hayang boga motor badag, da sibuk bisnis tea kolot na, "nu penting mah budak bungah". meren...

Padahal mah eta teh ngajurumuskeun si budak seuna anclum asup ka jalanan anu tungtung gabung jeung club motor, anu sababarahana rada lumpat kana kata anarkis...

Kuring mah sok hayang balik kajaman harita, mangsa jalan raya teh acan rea ku motor, nu make kareta mesin ontel (sesebutan sapeda baheula) ge acan pati rea da kasebat barang mahal bareto mah, malihan mah nu kagungan wahon ge( sesebatan mobil baheula) kaitung keneh ku curuk.

Baheula mah meren, da kuring ge teu kungsi ngalaman... si kolot teh baralik ngebon tengah poe teh mawa suluh jeung awi, salian keur masak eta suluh jeung awi, si awi teh di pake nyieun rorodaan keur si budak, saking hayang mere bungah ka budak na.. Nyieun rorodaan na teh di barengan ku budak na nu alewoh loba tatanya, bari di baturan ku indung na nu keur nyiaran adi na sabari nyaneut kulub sampe hasil kebon bapak na nu di haneutan ku cai enteh panas tina teko nu baheula mah kendi keneh. Lumpat kasorenakeun si rorodaan teh geus jadi, si bapak ngajarkeun kabudak make eta kaulinan bari sasakali pangadorongkeun. ngarasa geus bisa, eta si budak ngajak adi na nu keur di siaran ku indung na, make eta rorodaan bari di pangadorongkeun sakali ewang,

Teu lila babaturan eta budak teh ngariung di eta buruan da ningali aya kaulinan rorodaan eta.. bari ngadodorong adi na, eta si budak balakecrakan jeung babaturana nunutur ngadorong eta rorodaan nu di tumpakan ku rayi na tea..

Beuh... ki dulur... meren iyeu nya nu di sebut silih asah, silih asih, silih asuh teh,, Bapak na nga Asah, ngajarkeun pikeun budak na bisa ngarobah hasil bumi sangkan jadi rorodaan nu boga fungsi leuwih, Indung na Mika asih ka Salaki jeung kanu jadi budak mang nyuguhkeun Sampe jeung cai enteh pikeun ngahaneutan eta suasana. Si budak ngasuh adi na pikeun anteng naek eta rorodaan nepika tatangga na, babaturan eta budak milu resep pangasuhkeun adi na nu keur naek eta rorodaan..

Geus hese ayeuna mah ki dulur manggih suasana kitu teh.. bapak na saribuk di kantor, indung aya oge anu karir, si budak na mah meren tinggal narimaan duit ti kolot na we, bari kolot na teu apal eta duit ku si budak di pake naon....

Ah... urang mah kudu ngalobakeun Husnudon we, hade sangka. Mudah mudahan eta barudak zaman kiwari teh bisa ngajagi amanah ti kolot na anu eunya da saribuk so teh pikeun kamajuan barudak na..

Pun sampun kuring neda rea pangampura bilih dina basa atawa caritaan nu ku kuring serat ti luhur aya tutur saur teu ngajalur nu di caturkeun, rejeung teu merenah kana manah nu maca iyeu carita.. Anggap we iyeu mah curhatan pangeling ka diri abdi pribadi, rejeung sing aya panggugah ka baraya salerea sangkan urang teh tong kabawa teuing ku arus moderenisasi, arus pasar global. Sing panceg dina jalur pangwaris urang salaku ajen inajen ki sunda anu amis budi gemah ripah repeh rapih..

Cag...

WASAALAMUALAIKUM WR. WB

NASKAH runtuyan acara

Prosesi upacara adat PATURAI TINEUNG

 SISWA / SISWI

KELAS VI sd, IX smp, XII sma / smk

                        

                                                        

                

Di Publish Ku : M. Indra Yuliansyah s. pD. sd

NASKAH PROSESI PANGBAGEA

PATURAI TINEUNG SISWA / SISWI KELAS 6

* Prolog bubuka : gending geder ( 4 / Ti )

Niti wanci nu titih rintih

Ninggang mangsa nu nalangsa

Bral anaking geuera miang

Mugia hidep aya dina kajembaran

Heup nepi kapoe iyeu hideup di ajar ku ibu jeung bapa

tuh tingali, kumelip bentang endah gumawang

Bral Geura teang anaking

Bral geura miang

* Di buka ku rajah pamuka : gending geder ( 4 / Ti )

            Pun sampun ka sangrumuhun sangrumuhun nu beh ditu

Pun sampun ka sangrumuhun sangrumuhun nu beh ditu

Manawi tatamu saha

Rumaos ua leleda

Dilanglangan kasimpangan

Sugan geus lambaran beja

Sakedap antosan heula uwa tumut kasalira

Seja ngembarkeun bewara kasakumna balarea

Pun sampun

Uwa nebarkeun nu sumping

Tuh atra ngaleut ngalabring

Der gending geura ramekeun

Bral miang geura papageun

Bur payung geura bukakeun 3X

* Payung agung, Penggawa, Jeung Umbul-umbul mapag di pirig ku gending Gambir sawit

* Ua lengser mapag di pirig ku gending kunang – kunang

Paman lengser mugi lungsur

Tuh tatamu tos sarumping

Ngaleut ngengkleung ngabandaleut

Ngembat ngantai nyatang pinang

Mangga geura bageakeun

Mangga geura bageakeun

Tuh ua lengser Dangdan dangdang meuni mencleng

                        Lir satia totopong na meuni neuteup

Leumpang gagancangan ampir ti gebrus ka kulah

Leumpang gagancangan ampir ti gebrus ka kulah

Tuh ua lengser Dangdan dangdang meuni mencleng

Lir satia totopong na meuni neuteup

Totopongna condong, teu beda lir maung ompong

Totopongna condong, teu beda lir maung ompong

* Dayang Mapag di pirig ku gending  lalayaran

            SEKAR MANIS :         Ku lucu malati Nu aya di taman taman sari

 Ku lucu malati Nu aya di taman taman sari

 Hiur seungit manis Nu geulis putri mantili

 Hiur seungit manis Nu geulis putri mantili

 Ku hegar ermawar Nu aya di taman sekar

 Ku hegar ermawar Nu aya di taman sekar

 Sedeng mangkak barekah Aduh manis jeung dahlia 

 Sedeng mangkak barekah Aduh manis jeung dahlia 

Kleung ngangkleun sagara ombak – ombakan

Kleung ludeung sangsara bongan sorangan

Kleung ngangkleun sagara ombak – ombakan

Kleung ludeung sangsara bongan sorangan

Haturan haturan, haturan wilujeung sumping

Haturan haturan, haturan wilujeung sumping

Di anti anti kamari

Di antosan ti baheula

Kleung ngangkleung sagara ombak – ombakan

Kleung ludeung sangsara bongan sorangan

* Ngalung bunga (Mangle’)

            Kembang tawis pangbagea

Malati sacaning ati

Bodas nyacag

Pangabengras

Satia bageanana

* Ua lengser ngajajap rombongan kelas genep ka panggung, nu di teraskeun kana sembah sungkem di pirig ku gending catrik kawih dareuda pileuleuyan.

Paturai…. Pileuleuyan pileuleuyan

Ti ayeuna urang teh bakal paanggang

Anggang so’teh ukur dina titinggalan

Teubih so’teh duh tina reretan

            Dina manah urang teh teu pileuleuyan

            Dina ati teu paanggang

            Kaemutmah urang kantos sasareungan

Pileulueyan piuleuleuyan duh lahir paangang

*SEMBAH SUNGKEM

- *Narasi panganter

Anaking

Mimiti poe iyeu hidep rek anggang

Genep taun hidep diaping ku bapak ibu guru

Aranjeuna nu ngatik ngadidik hidep ti leuleutik

Najan kudu maut huntu, mesat iga

Dalah dikumha, da eunya geus jadi pancen aranjeuna

Prak geura nyuuh nyusruk dina lahunan bari penta pangampurana

*Sembah sungkem kelas VI

-*Narasi prolog siswa

Ibu

Cunduk waktuna abdi undur

Bapa

Murag mangsana abid wakca

Parengna ayeuna pisan.  

Galindeung nelengnengklung

Nganterkeun abdi kana gapura kawaas

Kawaas harita genep taun

Abdi di ayun – ayun ku kadeudeuh ibu

Genep taun abdi di ambing – ambing ku ka asih bapa

Teu aya deui gerentes hate nu baris di ungkara

Mung paneda hapunteun tina kalelepatan anu ku abdi dilakonan

Yasa sareng wening galih ibu bapa

Kasangga kalingga murda

Katampi ku asta kalih

Disareungan ku panuhun anu taya lekasanana

Pangdu’a ibu sinareung bapa anu baris mungkas tepang urang

Wilujeung kantun bapa

Wilujeung kantun ibu

-*Narasi prolog guru

Anaking…

Kiara nu  ngarandakah asalna ngan  ukur  siki nu gedena moal leuwih ti sagede jempol

Garuda paksi nu ngapung ngawang – ngawang ngapak mega malang

Asalna ngan ukur endog nu gede na mo leuwih ti sagede perep.

Pon itu anaking….

Asa kamari hideup di ajar maca jeung ngitung.

Kamari pisan imut kareeut mapaesan endahna taman wiyata.

Awak leutik camperenik dina pulas polos, raray tangah  miharep diguratan.

Ngagenclang panon hideup netep pangareupan.

Bungah pisan mun harita hideup jadi pinunjul.

Kerep pisan kahoncewangan mun hidep teu tuhu kana pancen,

Kiwari hidep kudu mulang ka jati ning indung bapa.

Yakin temen dating jeung mulang silih baganti.

Saeutik pamenta ibu,,, masing suhud narungtut elmu.                            

Masing daria nyarungsi pangarti.

Sing kahade tong galider,

poma ulah rek rentas di jalan.

Kudu junun satungtung umur.

Bral geura miang anaking

Kadeudeuh ibu maneh meungkeut pageuh,

kanyaah bapa natrat sajajalan.

Tong honcewang ujang, kasep,, geulis,,

hariring angina ngagalinding nganteurkeun anjeun arindit.

Geura incah neuleuman sagara Allah ta’aala.

Unggahan gunung kakawasaan Allah nu maha agung.

Omat ulah rek adigung adiguna,

ulah rek agul ku pangabisa, atawa awuntah ku pangaboga.

Da kawaluyaan estu ukur injeuman, sakabeh allah ta’ala nu mibanda.

Bral geura miang anaking….

Geura ngaji kupangarti, geura hirup ku elmu.

Prak geura penta pangdu’a Indung bapak kana ridoNa.

Sing yakin kana wicaksana aranjeuna.

Niti wanci nu titih rintih

Ninggang mangsa nu nalangsa

Bral anaking geuera miang

-*Narasi panutup sembah sungkem

Jung nangtung anaking…..

Geura lieuk ka lebah kenca

Mungguh indung nu kudu dipunjung

Saeunyana bapa nu kudu di puja

Ayeuna hampeuk anteurkeun

Kabagjaan hideup ka aranjeuna..

-* Serah terima siswa kelas VI ti Kepala Sekolah ka orang tua siswa anu bade diwakilan ku ketua dewan sekolah

-* Serah terima STTB SD ti kepala sekolah ka wawakil siswa secara simbolis ( Saterasna di sanggakeun ka orang tua na

-* Narasi panyambat

Bagea anaking pangwilujeung ibu bapa mareungan panggupay hideup poe ieu.

Sakali deui hampura ibu hampura bapa,,  

ngan sakitu – kituna kabisa ibu jeung bapa ngatik ngadidik hideup.

Hiyap anaking kadieu, geuwat geura ngantay laleumpang jeung ki sobat.

Prung geura nguntun ramo patutuyun jeung batur – batur.

Urang imeutan sagala kasalahan.

Jangji goring parangi urang pupus tina sanubari.

Ampun paralun anaking.

Ibu sinareung bapa lain rek nundung..

Katineung poe iyeu urang teundeun dina handeuleum sieum,

Urang tunda dina hanjuang siang….

Cag

Cipanas, 30 Mei 2014

M. Indra Yuliansyah

-* Sawer Pikeun piwuruh murang kalih

Kidung :           Bismillah ngawitan ngidung

Sumalindung ka illahi

Ka allah nu maha heman

Ka asep geulis sarindit

Kanu keur kasinugrahan

Rahmat jeung hidayah keur hidep sadaya

Kuna sari :       Nyukcruk galur ti karuhun, nutur lacak para wali

Jembar ka balarea, Titinggal ti nini aki ngawaris kabudayaan

Seni sunda Sawer asih

Muga agung cukup lumur, neda jembar pamaksami

Bilih aya kalepatan

Bilih ayeuna simkuring nyawer hidep nu bakal paturai

Nyanggakeun mugi di tampi

Payo    :          Hidep mimiti di wuruh, Dangukeun ku dua cepil

Simpen di manah nu jembar, Ayenamah beda deui

Jaman hidep lalagasan, Teu aya anu meredih

Minangkit iyeu kapayun, Hideup kedah tatih tatih

Ngajalankeun kawajiban, Tuluy ngudag cita – cita

Di ajar sing daria, Sangkan hidep hirup bagja

Akang nyawer mung sakitu, Mugia hidep anakaing,

Runtut rawut sauyunan,

Kacai jadi saleuwi, Kadarat jadi salebak

Jaauh balahi, parat riski

wur tawu jati rahayu

rahayu mancing walagri

    

Amin ya robbal alamin

Mugi allah nangtayungan

SALAH SAWIOS  KAWIH – KAWIH KANGGO MIRIG NU SUNGKEM UPACARA PATURAI TINEUNG SISWA

 
                        Nelengnengklung

          Nelengnengkung 2x

         Geura geude geura jangkung
         Geura nyiar elmu luhung

         Geura mikanyaah Indung
            Lunta ka curug cipandak
            Dugi kana babantara
             Cintana indung ka anak
              Sesah milari pantarna

           

           

Dareuda - Pileuleuyan

Paturai…. Pileuleuyan pileuleuyan

Ti ayeuna urang teh bakal paanggang

Anggang so’teh ukur dina titinggalan

Teubih so’teh duh tina reretan

            Dina manah urang teh teu pileuleuyan

            Dina ati teu paanggang

            Kaemutmah urang kantos sasareungan

Pileulueyan piuleuleuyan duh lahir paangang

Pupunden Ati

Duh anak ibu, Nu geulis pupunden ati

Geus bias ulin, geus capetang jeung ngopepang

Teu weleh deudeuh, najan bangor  toloheor

Tambah kanyaah, sarengkak saparipolah

Duh anak ibu, nu geulis pupunden ati

Ibu ngahariring, lain hariring birahi

Duh bari nembang, lain perbawa asmara

Di eyong eyong, lain eyong teu sabrongbrong

Sapu Nyere

Ririungan urang karumpul
meumpeung deukeut hayu rang sosonoan
Macangkrama bari ngawadul
urang silih tempas silih eledan
       Moal lila jeung babaturan
       hiji wanci anu geus ditangtukeun
      Bakal pisah bakal pajauh
      bakal mapohokeun katineung urang
Sapu nyere pegat simpai bakal kasorang takdir
ti Gusti Hyang Widi pasti kalakon

Urang rek papisah urang rek pajauh
meumpeung deu keut hayu rang sosonoan

Kawih Persembahan ti kelas 6 :                                                              

GURU

Guru pahlawan mulia

Tekad anjeun nu satia

Ngadidik henteu pandang pamrih

Ngajar teu mihareup jasa

            Hujan teu jadi halangan

            Panas henteu laas laas

            Najan loba rintangan

            Anjeun henteu weuleh datang

Wilujeng ka bapa guru

Wilujeng ka ibu guru

Anjeun insan teladan

Pahlawan sagala jaman

            Ranggeuyan sungkeman ka heman

            Kanyaah nu moal sirna

            Rek di bawa sanajan ka amerika

            Di keukeup di tunda di piguraan

Ranggeuyan sungkeman ka heman

Kadeudeuh meumpeng padeukeut

Rek pajauh saukur ninggalkeun bangku

Hate mah lir gula rejeng amis na

 PATURAI PILEULEUYAN

Asa kamari, urang sasareunga

Di ajar di aping ibu bapa guru

Asa can lami urang sasareungan

Cunduk waktosnaayeuna papisah

Papisah urang bakal papisah

Pateubih urang bakal pateubih

Paanggang urang bakal paanggang

Paturai urang bakal paturai

Lulus ujian kacipta bungah na

Ibu bapa guru nu ageung yasana

Junun sakola ngudak cita – cita

Muga – muga jaga, urang tepung deui

Pileuleuyan sobat – sobat salerea

Pileuleuyan duh ibu bapa guru

Rek papisah kacipta sedihna

Pileuleuyan nu kantun waas na                                                          

                                                                       

                                                                        Panutup ti simkuring :

Sakitu nu kapihatur

Kabayan na bade miang heula nyak ka lembur batur, ke ge mulang tos waktos na mah..

  Cag...!!!!!

      M. Indra Yuliansyah S. Pd. SD